ரசப்பொடி

தேவையானவை :

காய்ந்த மிளகாய்- 1கப்

தனியா – 1கப்

சீரகம்- கால் கப்

மிளகு-கால் கப்

வெந்தயம்-2 ஸ்பூன்

மஞ்சள் பொடி- கால் ஸ்பூன்

துவரம் பருப்பு – கால் கப்

கடலைப் பருப்பு- கால் கப்

பெருங்காயம்- 3 ஸ்பூன்

கருவேப்பிலை- ஒரு கைப்பிடி.

தயாரிக்கும் முறை:

மேலே சொன்னவற்றை தனித்தனியாக வறுத்து எல்லாவற்றையும் சேர்த்து பொடி

செய்து கொள்ளுங்கள். அதனை இறுக்கமான டப்பாவில் வைத்து பயன்படுத்துங்கள்.

மைசூர் ரசம் :

மேற்கூறிய எல்லா பொருட்களுடன் கொப்பரைத் தேங்காவையும் வறுத்து பொடி செய்து கொள்ள வேண்டும்.

உடுப்பி ரசம் :

மேற்கூறிய பொருட்களை தேங்காய் எண்ண்யில் வறுத்து பொடி செய்து காற்று புகாத

கன்டெய்னரில் வைத்துக் கொள்ளுங்கள்.

ரசம் தயாரிக்கும் முறை ;

கால் கப் துவரம் பருப்பை வேக வைத்துக் கொள்ளுங்கள். 4 நடுத்தரமான தக்காளியை நறுக்கி, வெதுவெதுப்பான சுடுநீரில் ஊற வைத்து மசித்துக் கொள்ளுங்கள். இதில் மஞ்சள் பொடியை கால் ஸ்பூன் சேர்த்து அடுப்பில் கொதிக்க விடவும்.

நன்றாக பச்சை வாசம் போனதும், தயாரித்து வைத்திருந்த ரசப்பொடியை 2 ஸ்பூன்

சேருங்கள். அல்லது ஆட்களுக்கு தகுந்தாற்போல், அதிகமாகவும் போட்டுக் கொள்ளலாம். அதனை கொதிக்க விடுங்கள்.

நன்றாக கொதித்து பொங்கி வரும் நேரம் வேக வைத்த துவரம் பருப்பை மசித்து, நீரூற்றி கரைத்து பொங்கி வரும் ரசத்தில் ஊற்றவும். பின்னர் கொத்துமல்லி, கருவேப்பிலையை நறுக்கி போடுங்கள். மீண்டும் ரசம் பொங்கும் போது அணைத்து விடுங்கள்.

தாளிக்க :

நெய்யில் கடுகு, சீரகம், கருவேப்பிலை, பெருங்காயம் சேர்த்து தாளித்து ரசத்தில் கொட்டி மூடி விடுங்கள்.கம கம ரசத்தில் வீடே மணக்கும்.

குறிப்பு :

புளி ரசம் : புளிக்கரைசலிலும் இந்த ரசம் பண்ணலாம். அப்போது தக்காளியின் அளவை பாதியாக குறைத்துக் கொள்ளுங்கள்.

எலுமிச்சை ரசம் : எலுமிச்சை ரசம் வேண்டுமென்றால் தாளித்த பின் கால் கப்

எலுமிச்சை சாறு ஊற்றி விடுங்கள்.

பூண்டு ரசம்- இதற்கு ரசப்பொடி போடும் போது பூண்டையும் இரு பற்கள் தட்டிப் போட வேண்டும்.

நன்றி : வந்திய தேவன் - அறுசுவை சைவ உணவுகளும் ஆரோக்கிய குறிப்புகளும்